Definisies en Terme: Fisika Graad 12

'n Omvattende stel vraag-en-antwoord flitskaarte wat al die amptelike fisika-definisies, wette en kernbegrippe vir Graad 12 dek.

Wat is elektromagnetiese induksie?

Die verskynsel waar 'n emk, asook 'n elektriese stroom in 'n geleier geïnduseer word deur 'n veranderende magneetveld rondom die geleier.

Wat stel Faraday se wet vir Elektromagnetiese induksie?

Die grootte van die emk wat geïnduseer word in 'n spoel is direk eweredig aan die tempo van verandering van die magnetiese vloed.

Wat behels die motoreffek?

'n Stroomdraende geleier wat binne in 'n magneetveld geplaas word ondervind 'n magnetiese krag.

Wat is die wgk-potensiaalverskil (of wgk-spanning)?

Die WS-potensiaalverskil wat dieselfde hoeveelheid energie verbruik/oordra as 'n ekwivalente GS-potensiaalverskil.

Wat is die wgk-stroom?

Die wisselstroom wat dieselfde hoeveelheid energie verbruik/oordra as 'n ekwivalente gelykstroom.

Watter twee kernbeginsels van lig word deur die foto-elektriese effek gedemonstreer en bewys?

Dit demonstreer die deeltjie-aard van lig en bewys dat ligenergie gekwantiseerd is en oorgedra word as fotone.

Wat is die definisie van die foto-elektriese effek?

Die proses waardeur elektrone uit 'n metaaloppervlak vrygestel word wanneer lig van geskikte frekwensie invallend op die oppervlak is.

Wat is drumpelfrekwensie (of afsnyfrekwensie)?

Die minimum frekwensie lig benodig om elektrone uit 'n sekere metaaloppervlak vry te stel.

Wat is die werkfunksie (of arbeidfunksie)?

Die minimum energie benodig om 'n elektron uit die oppervlak van 'n metaal vry te stel.

Hoe vorm 'n atoom-lynemissiespektrum en hoe lyk dit?

Dit vorm wanneer sekere frekwensies van elektromagnetiese straling uitgestraal word as gevolg van 'n atoom se elektrone wat 'n oorgang van 'n hoë energietoestand na 'n laer energietoestand ondergaan; dit bestaan uit 'n paar gekleurde lyne wat elkeen 'n ander frekwensie verteenwoordig.

Wat is 'n atoom-absorpsiespektrum en hoe ontstaan dit?

Dit is 'n deurlopende spektrum waarvan sommige kleure of frekwensies ontbreek (met swart lyne in die gapings) wat ontstaan as die elektrone van gasatome ligfotone by kenmerkende frekwensies absorbeer wanneer hulle van 'n laer na 'n hoër energietoestand beweeg.

Wat is 'n rooiverskuiwing en wat dui dit aan omtrent die heelal?

'n Verskynsel waar lig van 'n voorwerp in die ruimte na die rooi kant van die spektrum verskuif na laer frekwensies en langer golflengtes weens die Doppler-effek; dit dui daarop dat die voorwerp van ons af wegbeweeg en ondersteun die teorie dat die heelal aan die uitbrei is.

Hoe word arbeid wat deur 'n konstante krag op 'n voorwerp verrig word, gedefinieer?

Dit is $F \Delta x \cos(\theta)$, waar $F$ die grootte van die krag, $\Delta x$ die grootte van die verplasing en $\theta$ die hoek tussen die krag en die verplasing is.

Wat behels die arbeid-energiestelling?

Die netto arbeid verrig op 'n voorwerp is gelyk aan die verandering in kinetiese energie van die voorwerp OF die arbeid verrig op die voorwerp deur 'n netto krag is gelyk aan die verandering in kinetiese energie van die voorwerp.

Wat is 'n konserwatiewe krag?

'n Krag waarvoor die arbeid verrig om 'n voorwerp tussen twee punte te beweeg, onafhanklik is van die roete wat gevolg word.

Wat is 'n nie-konserwatiewe krag?

'n Krag waarvoor die arbeid wat dit verrig om 'n voorwerp tussen twee punte te beweeg, afhanklik is van die roete wat gevolg word.

Wat behels die beginsel van die behoud van meganiese energie?

Die totale meganiese energie (som van die kinetiese energie en gravitasie potensiële energie) in 'n geïsoleerde sisteem bly konstant (behoue).

Wat is drywing?

Die tempo waarteen arbeid verrig of energie verbruik of oorgedra word.

Wat behels Coulomb se wet?

Die grootte van die elektrostatiese krag wat een puntlading op 'n ander puntlading uitoefen, is direk eweredig aan die produk van die groottes van die ladings en omgekeerd eweredig aan die kwadraat van die afstand tussen hulle.

Wat is 'n elektriese veld?

'n Gebied in die ruimte waarin 'n elektriese lading 'n elektrostatiese krag ondervind.

Wat is die elektriese veld by 'n punt?

Die elektrostatiese krag wat per positiewe eenheidslading wat by daardie punt geplaas is, ondervind word.

Wat behels die kwantisering van lading?

Die elektriese lading op 'n voorwerp is 'n heelgetal veelvoud van die elementêre lading (die elektronlading).

Wat is 'n elektriese veldlyn?

'n Denkbeeldige lyn wat die rigting en sterkte aandui waarlangs 'n positiewe toetslading sal beweeg as dit op 'n spesifieke punt in die elektriese veld geplaas word.

Wat is die Doppler-effek?

Die verandering in frekwensie (of toonhoogte) van die klank waargeneem deur 'n luisteraar omdat die klankbron en die luisteraar verskillende snelhede relatief tot die medium waarin die klank voortgeplant word, het.

Wat behels Ohm se wet?

Die potensiaalverskil oor 'n geleier is direk eweredig aan die stroom in die geleier by konstante temperatuur.

Wat is 'n ohmiese geleier?

'n Geleier wat Ohm se wet gehoorsaam.

Wat is 'n nie-ohmiese geleier?

'n Geleier wat nie Ohm se wet gehoorsaam nie.

Wat is die emk van 'n battery?

Die maksimum energie wat die battery lewer per eenheidslading wat daardeur vloei.

Wat is die interne weerstand van 'n battery?

Die weerstand wat die battery bied teen die lading wat daardeur vloei.

Wat is 'n skalaar?

'n Fisiese hoeveelheid wat slegs grootte besit.

Wat is 'n vektor?

'n Fisiese hoeveelheid wat grootte en rigting besit.

Wat is 'n resulterende of netto krag?

Die vektorsom van al die kragte wat op die voorwerp inwerk; dit het dieselfde effek as al die kragte wat gelyktydig op die voorwerp inwerk.

Wat is die normaalkrag?

Die krag of komponent van 'n krag wat 'n oppervlak op 'n voorwerp waarmee dit in kontak is, uitoefen en wat loodreg op die oppervlak is.

Wat is wrywingskrag en watter faktore beïnvloed dit?

Die krag wat die beweging van 'n voorwerp teenwerk en wat parallel met die oppervlak inwerk; dit is direk eweredig aan die normaalkrag, afhanklik van die massa en die grofheid van die oppervlaktes ($\mu$), maar onafhanklik van die grootte van die kontakoppervlakte en die snelheid van beweging.

Wat is statiese wrywingskrag?

Die krag wat die neiging van beweging van 'n stilstaande voorwerp relatief tot die oppervlak teenwerk.

Wat is kinetiese wrywingskrag?

Die krag wat die beweging van 'n bewegende voorwerp relatief tot 'n oppervlak teenwerk.

Wat is traagheid en wat dien as 'n kwantitatiewe maatstaf daarvan?

Die weerstand van 'n voorwerp teen enige verandering in sy toestand van beweging; die massa van 'n voorwerp is 'n kwantitatiewe maatstaf van sy traagheid.

Wat is versnelling?

Die tempo van verandering van 'n voorwerp se snelheid.

Wat behels Newton se Eerste bewegingswet?

'n Liggaam sal in sy toestand van rus of beweging teen konstante snelheid volhard tensy 'n nie-nul resulterende/netto krag daarop inwerk.

Wat behels Newton se Tweede bewegingswet?

Wanneer 'n resulterende/netto krag op 'n voorwerp inwerk, sal die voorwerp in die rigting van die krag versnel teen 'n versnelling direk eweredig aan die krag en omgekeerd eweredig aan die massa van die voorwerp.

Wat stel Newton se Tweede bewegingswet in terme van momentum?

Die netto (of resulterende) krag wat op 'n voorwerp inwerk, is gelyk aan die tempo van verandering van momentum van die voorwerp in die rigting van die netto krag.

Wat behels Newton se Derde bewegingswet?

Wanneer voorwerp A 'n krag op voorwerp B uitoefen, oefen voorwerp B gelyktydig 'n krag van gelyke grootte in die teenoorgestelde rigting op voorwerp A uit.

Wat behels Newton se Universele Gravitasiewet?

Elke liggaam in die heelal trek elke ander liggaam aan met 'n gravitasiekrag wat direk eweredig is aan die produk van hulle massas en omgekeerd eweredig is aan die kwadraat van die afstand tussen hulle middelpunte.

Wat is momentum?

Die produk van 'n voorwerp se massa en sy snelheid.

Wat is impuls?

Die produk van die netto (of resulterende) krag wat op 'n voorwerp inwerk en die tyd wat die netto krag op die voorwerp inwerk.

Wat is 'n geïsoleerde sisteem?

'n Sisteem waarop die netto eksterne krag nul is.

Wat behels die beginsel van behoud van lineêre momentum?

Die totale lineêre momentum in 'n geïsoleerde sisteem bly konstant (behoue).

Wat is 'n elastiese botsing?

'n Botsing waar die momentum en kinetiese energie behoue bly.

Wat is 'n onelastiese botsing?

'n Botsing waar die momentum behoue bly maar nie die kinetiese energie nie.

Wat is vryval?

Die beweging waartydens die enigste krag wat op 'n voorwerp inwerk die gravitasiekrag is.

Wat is 'n projektiel?

'n Voorwerp waaraan 'n beginsnelheid gegee is en wat dan slegs onder invloed van die gravitasiekrag beweeg.